Mitouére-Fade d’antioche-Mitouarde oub’dame aux chats .

-

« Sinné vous les fames et vous ôtes teurtous qu’avez d’la r’lighion ! Ar’gardez vos bots et seyiez pas minprisant , thiélle istoére seri quaziment in biasfème ! Les houmes se douévant de saquer z’eu pougne en l’darre de z’eu échine , dans les pouches des thuilottes oub’ out’ part, mé qu’al se voéyissant pas ! »

-

Ol é t’ine fame qui causait de m’inme ! Et toutes thiélles qu’écoutiant s’avant sinné la croé sus les épales, troés cot et les houmes avant argardé à bas . Thieuque in avant thiyté l’bounet . Ine veuille fame qu’a la goule toute melé , ine piâ mé crusé d’règhes que la veursene dau grand pianti, thielle fame néssu ol a mé d’in cent d’an-née, a teurjou dans la souv’nance les istoéres de sa jhénesse , mé otout thielle de la jhénesse de sa méman , de sa mérine , et des ghens dau pays d’Aunis de vour qui z’étiant teurtous . Al a apiloté , de conte, dans sa teite, les istoéres qui v’nant dau couté d’soun’ houme , pisqu’ol a bin fallu le seugre , thieu ventre rôghe . Et de thiés contes , thielles les léghendes, thiélles les istoéres , ol en a ine, anneu , qu’al va douner au monde :
Thielle de la Mitouére ! Les saintongheais disiant « Mitouarde » Asteur ol a peursoune qui n’en cause . Ol é ine istoére pardue , d’in pays pardu ! Thiélle de la dame aux chats, thielle de la fade d’Antioche .

-

La mitouére ol é ine jholie feuille dau pays d’antioche . Ol a teurjhou pien de chats bian à l’entour des cot’yion , sus l’épale oub’ dans sa dorne, ol é la fade aux chats . Son père coppe dau vê por fieuri les piarres appoué, vour que l’monde d’antioche veniant feire la danse ronde les neut’ de grand lunâ.
Por le temps des acoubyages de la mitouarde, ine trâlé de ghens yiette le prince qui s’en vint teurché fame jhusque dans thieu pays dau bout’des târes . Por d’azard vour y se rendrait de neut’ , la mitouére a feit l’envoye de ses chats tout dau long dau charré qui cope la saintonghe dépeu Saintes jhusqu’en târe d’antioche . Les chats aviant por ouvraghe de seugnifié l’passaghe au jhène houme en fazant éthliairé chaque d’in leu z’ oeuils jhaunes . O s’en trouvi , à moué , des cents et des cents au long dau ch’min et d’cha couté.
Mé le jhène promis , thieu soé disant prince, étit reun qu’in chéti , in chéti mouveis coume ine gale!

-

Quant les chats avant feit beurtiyé tou thiés oeuils dans la pré , le ch’min teurleusait jhaune et thieu sabiâ a requeneusu qu’ol était des bétiaux qui s’éboughiant pas mé qu’ine éstatue (pasqu’y faziant bein comme ol l’éti signifié ). Thieu sauvaghe empougna soun’ âcherau a deus copes et en le fazant viré , décopa la teite des chats . Les pauves oeuils douniant des fiames roughes dau sang de thiés chats qui restiant là pianté . Thieu prince sailli dret des enfars avancait teurjhou en tuant la chandelle en l’darre de l’y et en l’darre de l’y , le ch’min s’touvi équiairé d’ rôghe et d’vant l’y le ch’min teurleusait’ en jhaune . Por châ teite qu’y coppait le ch’min cheyait d’in pié , mé fou pardu peur sa tuerie , l’aïssabye sarviteur , a point vu que la sol cheyait en in fondrau et qu’l'aive , déjha bronzait sus les târes d’Antioche . Coume y badait la goule en huchant , ine grouse vague l’a nighé et chareuiyé au fond dau profond , vour que les chancres l’avant dépiauté .

-

A l’aubette , in jhène beurghé ébobé de voére au long dau ch’min des jhoute rabe crusé vour qu’o fiamait encoére des raste de chandelle de suin, chéyit de thiu en teurchant devant l’y : Antioche étit pus là , les vagues de l’océan z’y faziant ine grouse courtouère .

-
-

-

-